கோவை ஆனைக்கட்டியில் 13 ரிசார்ட்டுகள் மூடல்; மேலும் 12 ரிசார்ட்டுகளுக்கு இறுதி நோட்டீஸ்.

கோவை: ஆனைக்கட்டி பகுதியில் யானைகளின் வழித்தடங்களை ஆக்கிரமித்தது உள்ளிட்ட விதிமீறல்கள் தொடர்பாக, சென்னை உயர் நீதிமன்ற உத்தரவின்படி ஏற்கெனவே 13 ரிசார்ட்டுகள் மூடப்பட்டதைத் தொடர்ந்து, மேலும் 12 நிறுவனங்கள் மீது மூடல் நடவடிக்கைகள் தொடங்கப்பட்டுள்ளன. கோவை மாவட்ட ஆட்சியர் பவன்குமார் கி. கிரியப்பனவர், அக்டோபர் 7ஆம் தேதி சென்னை உயர் நீதிமன்றத்தில் இது தொடர்பான விரிவான நிலை அறிக்கையைத் தாக்கல் செய்துள்ளார். ஆனைக்கட்டி பகுதியில் வனவிலங்குகளின், குறிப்பாக யானைகளின் இயல்பான நடமாட்டப் பாதைகளை ரிசார்ட்டுகள் மற்றும் வணிக நிறுவனங்கள் ஆக்கிரமித்துள்ளதாகவும், தேவையான அனுமதிகள் இன்றி செயல்படுவதாகவும் மனுதாரர் எஸ். முரளிதரன் நீதிமன்றத்தில் புகார் அளித்திருந்தார். இந்த வழக்கை விசாரித்த நீதிமன்றம், சம்பந்தப்பட்ட நிறுவனங்களின் ஆவணங்கள் மற்றும் அனுமதிகளைச் சரிபார்த்து உரிய நடவடிக்கை எடுக்க மாவட்ட நிர்வாகத்திற்கு உத்தரவிட்டது. இதையடுத்து, பெரியநாயக்கன்பாளையம் ஒன்றியத்திற்கு உட்பட்ட 24 வீரபாண்டி மற்றும் நஞ்சுண்டாபுரம் ஊராட்சிப் பகுதிகளில் உள்ள 33 நிறுவனங்களில் அதிகாரிகள் கூட்டாய்வு மேற்கொண்டனர். இதில், நகர் ஊரமைப்புத் துறை (DTCP), வனத்துறை, ஊரக வளர்ச்சித் துறை மற்றும் வருவாய்த் துறை அதிகாரிகள் பங்கேற்றனர். ஆய்வில் கண்டறியப்பட்ட விதிமீறல்களின் அடிப்படையில், ஆனைக்கட்டி ஹில் வியூ காட்டேஜஸ், பாரத் ஹாலிடேஸ் ரிசார்ட், கார்னிச் இன் ரிசார்ட், டால்பின் ரிசார்ட், ஃபயர்ஃபிளை ஃபார்ம் ஹவுஸ், ஜிமேக்ஸ் ஹில் வியூ ஃபார்ம் ஹவுஸ், கேகே செல்ஃபி பாயின்ட் ரிசார்ட்ஸ், மதுரம் காட்டேஜ், ஹில்ஸ் அண்ட் வேலீஸ் ஃபார்ம் ஹவுஸ், காற்று ஃபார்ம் ஸ்டே மற்றும் ஜிமேக்ஸ் ஆகியவை மூடப்பட்டுள்ளன. இதுதவிர, கொண்டனூரில் உள்ள இரண்டு காட்டேஜ்களும், 24-ஆம் எண் வீரபாண்டி பகுதியில் உள்ள ஒரு காட்டேஜும் மூடப்பட்டுள்ளன. கட்டட அனுமதி, திட்ட அனுமதி மற்றும் பிற கட்டாய ஒப்புதல்கள் தொடர்பான விதிமுறைகள் ஆய்வு செய்யப்பட்டதைத் தொடர்ந்து இந்த நடவடிக்கை எடுக்கப்பட்டுள்ளது. திட்ட அனுமதிகளில் இருந்து விலகல்கள் மற்றும் கட்டட ஒப்புதல் தொடர்பான விதிமீறல்கள் கண்டறியப்பட்டதைத் தொடர்ந்து, மேலும் 12 நிறுவனங்கள் மீது மூடல் நடவடிக்கைகள் தொடங்கப்பட்டுள்ளன. அவை: ஆரா ஜங்கிள் ரிசார்ட், புளூ ஹில்ஸ் கிளப், வைல்ட் வுட்ஸ் ரிசார்ட் ஆனைக்கட்டி, ப்ரூஸ் 43 ரெஸ்டோ அண்ட் கஃபே, எலிஃபண்ட் கன்ட்ரி ஃபார்ம் ஸ்டே, ஃபைவ் ஸ்டார் கார்டன் ரெஸ்டாரன்ட், சர்வா ஃபார்ம் ஹவுஸ், சிகாரா ஃபார்ம் ரிட்ரீட், எஸ்ஆர் ஹேப்பி வேலி ஃபார்ம்ஸ், எஸ்ஆர் ஜங்கிள் ரிசார்ட், எஸ்ஆர் எம்டி காட்டேஜ் மற்றும் சஃபாரி ஃபார்ம்ஸ் ரிசார்ட் அண்ட் லீஷர். காரமடை பகுதியில் உள்ள ஆரா ஜங்கிள் ரிசார்ட்டில், அங்கீகரிக்கப்பட்ட கட்டடத் திட்டத்திற்கு மாறாகக் கூடுதல் கட்டமைப்புகள் அமைக்கப்பட்டுள்ளதாக அறிக்கையில் சுட்டிக்காட்டப்பட்டுள்ளது. எஸ்ஆர் ஜங்கிள் ரிசார்ட் கட்டட அனுமதி கோரி விண்ணப்பித்திருந்தபோதிலும், அதன் மீதும் மூடல் நடவடிக்கைகள் தொடங்கப்பட்டுள்ளதாக மாவட்ட நிர்வாகம் தெரிவித்துள்ளது. இதற்கு முன்பு, எட்டு ரிசார்ட்டுகள் தொடர்பான வழக்கு விசாரணையின்போது, கூடுதல் நிறுவனங்களின் ஆவணங்களைச் சரிபார்த்து ஆய்வு செய்ய மாவட்ட நிர்வாகத்திற்கு நீதிமன்றம் உத்தரவிட்டிருந்தது. இதன் தொடர்ச்சியாக, அப்பகுதியில் அடையாளம் காணப்பட்ட 33 நிறுவனங்களின் அனுமதிகள் மற்றும் உரிமங்களை விரிவாகச் சரிபார்த்து, உரிய ஒப்புதல்கள் இல்லாத நிறுவனங்கள் மீது நடவடிக்கை எடுக்க உத்தரவிடப்பட்டது. இதற்கிடையே, தர்சா ரிசார்ட்ஸ், மை வில்லேஜ் ஈகோ டூரிஸ்ட் ரிசார்ட் மற்றும் வைல்ட் டோர் கஃபே ஆகிய மூன்று நிறுவனங்கள் தேவையான அனுமதிகளைப் பெற்றுள்ளதாக ஆட்சியரின் அறிக்கையில் தெரிவிக்கப்பட்டுள்ளது. மேலும், ஆய்வுக்கு உட்படுத்தப்பட்ட ஐந்து இடங்கள் ரிசார்ட்டுகள் அல்ல; அவை தனிநபர்களுக்குச் சொந்தமான குடியிருப்புகள் என்றும் குறிப்பிடப்பட்டுள்ளது. மூடப்பட்ட ரிசார்ட்டுகளைச் சுற்றி அமைக்கப்பட்டுள்ள வேலிகள் வனவிலங்குகளின் இயல்பான நடமாட்டத்தைப் பாதிக்கக்கூடும் என்ற கவலையும் இந்த வழக்கில் எழுப்பப்பட்டுள்ளது. வனவிலங்குகள் பயன்படுத்தும் பகுதிகளில் அமைக்கப்பட்டுள்ள நிரந்தர வேலிகளை அகற்றவும், யானைகள் உள்ளிட்ட விலங்குகள் தங்களது இயற்கையான வழித்தடங்களில் தடையின்றி நடமாடுவதை உறுதி செய்யவும் மனுதாரர் கோரிக்கை விடுத்துள்ளார். உயர் நீதிமன்றத்தின் உத்தரவுகளின்படி, சம்பந்தப்பட்ட துறைகள் தொடர்ந்து நடவடிக்கை எடுத்து வருவதாக மாவட்ட நிர்வாகம் தெரிவித்துள்ளது.