கோவையில் போலி பணப் பரிவர்த்தனை ரசீது மூலம் ரூ.6 லட்சம் மதிப்பிலான பொருட்களை வாங்கி மோசடி செய்த நபர் கைது; சைபர் கிரைம் போலீசார் விசாரணை

Coimbatore: கோவையில் உள்ள பிரபல செல்போன் கடை ஒன்றிற்குத் தொலைபேசி வாயிலாகத் தொடர்புகொண்டு, போலி வங்கி ஆவணங்களைக் காட்டி ரூ.6 லட்சம் மதிப்பிலான ஐபோன்கள், ஸ்மார்ட் டிவி மற்றும் ஏ.சி பொருட்களை மோசடி செய்த வழக்கில், உக்கடம் பகுதியைச் சேர்ந்த ஷேக் அப்துல் காதர் (57) என்பவரை கோவை மாநகரச் சைபர் கிரைம் போலீஸார் கைது செய்தனர். கோவை நகரில் இயங்கி வரும் அந்தச் செல்போன் கடைக்குத் தொலைபேசியில் தொடர்புகொண்ட ஷேக் அப்துல் காதர், தனக்கு விலை உயர்ந்த 7 செல்போன்கள், ஸ்மார்ட் டிவி மற்றும் ஏ.சி உள்ளிட்ட மின்னணுப் பொருட்கள் உடனடியாகத் தேவைப்படுவதாகக் கூறினார். அப்பொருட்களின் விவரங்கள் மற்றும் படங்களைத் தனது வாட்ஸ்-அப் எண்ணிற்கு அனுப்புமாறு கேட்டுக் கொண்டார். கடை ஊழியர்களும் அவர் கேட்ட பொருட்களின் விவரங்கள் மற்றும் புகைப்படங்களை வாட்ஸ்-அப்பில் அனுப்பி வைத்தனர். சிறிது நேரம் கழித்துப் பேசிய அவர், அனைத்துப் பொருட்களும் பிடித்து உள்ளதாகவும் உடனடியாக வாங்க விரும்புவதாகவும் தெரிவித்தார். தொடர்ந்து, கோவையில் உள்ள முன்னணி நிறுவனம் ஒன்றின் பெயரைத் தெரிவித்து, அந்நிறுவனத்தின் ஜி.எஸ்.டி எண்ணையும் வழங்கி, அதன் பெயரிலேயே ரூ.6 லட்சத்திற்குப் பில் போடுமாறு கூறினார். கடை ஊழியர்களும் அவர் கூறிய நிறுவனத்தின் பெயரில் பில் தயாரித்து வாட்ஸ்-அப்பில் அனுப்பினர். பில்லைப் பெற்ற சில நிமிடங்களிலேயே மீண்டும் தொடர்புகொண்ட அவர், "உங்கள் வங்கிக் கணக்கிற்கு ரூ.6 லட்சத்தையும் அனுப்பி விட்டேன்" எனக் கூறி, பணம் வெற்றிகரமாகச் செலுத்தப்பட்டதாக (Online Transaction Successful) உருவாக்கப்பட்ட போலி வங்கி ரசீது ஆவணத்தை அனுப்பி வைத்தார். மேலும், "கடை வாசலில் எனது வாகனம் வந்து நிற்கும், அதில் பொருட்களை ஏற்ற அனுப்புங்கள்" எனக் கூறினார். அந்த போலி ரசீதை உண்மையானது என நம்பிய கடை ஊழியர்கள், ரூ.6 லட்சம் மதிப்பிலான செல்போன்கள் உள்ளிட்ட பொருட்களை வந்து நின்ற வாகனத்தில் அனுப்பி வைத்தனர். இரவில் கடையை மூடும் முன்பாகக் கடை நிர்வாகத்தினர் அன்றைய நாள் வங்கிப் பரிவர்த்தனைகளைச் சரி பார்த்த போது தான், வங்கிக் கணக்கில் ரூ.6 லட்சம் பணமே ஏறவில்லை என்பதும், அவர் அனுப்பியது போலி ஆவணம் என்பதும் தெரியவந்தது. ஏமாற்றப்பட்டதை உணர்ந்த கடை உரிமையாளர் உடனடியாக கோவை மாநகரச் சைபர் கிரைம் காவல் நிலையத்தில் (Coimbatore City Cyber Crime) புகார் அளித்தார். புகாரின் பேரில் வழக்குப் பதிவு செய்த போலீஸார், பொருட்களை ஏற்றிச் சென்ற வாகனம் மற்றும் செல்போன் எண்களை வைத்துத் தீவிர விசாரணை நடத்தினர். அதில், இந்த மோசடியில் ஈடுபட்டது கோவை உக்கடம் பகுதியைச் சேர்ந்த ஷேக் அப்துல் காதர் (57) என்பது தெரியவந்தது. அவரை அதிரடியாகக் கைது செய்த போலீஸார் மேற்கொண்ட விசாரணையில், இவர் ஏற்கனவே பல்வேறு கடைகளில் இதேபாணியில் போலி ஆவணங்களைக் காட்டி மோசடி செய்ததும், இவர் மீது ஏற்கனவே 4 மோசடி வழக்குகள் நிலுவையில் இருப்பதும் அம்பலமானது. கைதான ஷேக் அப்துல் காதரை போலீஸார் நீதிமன்றத்தில் ஆஜர்படுத்திச் சிறையில் அடைத்தனர்.