கனமழையால் மேட்டுப்பாளையம், காரமடை சாலையில் மரம் விழுந்து போக்குவரத்து பாதிப்பு

Coimbatore: மேட்டுப்பாளையத்தில் விடிய விடிய கொட்டித் தீர்த்த கனமழையால் கல்லாறு அருகே ராட்சத மரம் ஒன்று சாலையில் முறிந்து விழுந்து போக்குவரத்து கடுமையாக பாதிக்கப்பட்டது. மேட்டுப்பாளையம் மற்றும் அதன் சுற்றுவட்டார பகுதியான காரமடை, சிறுமுகை உள்ளிட்ட பல்வேறு பகுதிகளில் நேற்றிரவு முதல் இன்று காலை வரை தொடர்ந்து கனமழை கொட்டித் தீர்த்து வருகிறது. இதனால் பல்வேறு பகுதிகளில் சாலையில் மழை நீர் தேங்கியுள்ளது. இதனிடையே மேட்டுப்பாளையம் - ஊட்டி சாலையில் கல்லாறு அருகே ராட்சத மரம் ஒன்று வேரோடு சாய்ந்து சாலையில் விழுந்துள்ளது. இதனால் போக்குவரத்து கடுமையாக பாதிக்கப்பட்டது. இச்சம்பவம் குறித்து அறிந்த மேட்டுப்பாளையம் போலீசார், தீயணைப்பு துறையினர் மற்றும் நெடுஞ்சாலை துறையினர் இணைந்து சாலையில் விழுந்த மரத்தை வெட்டி அப்புறப்படுத்தும் பணியில் ஈடுபட்டு வருகின்றனர். இதேபோல் காரமடை - தோலம்பாளையம் சாலையில் மருதூர் அருகே சாலையின் குறுக்கே மரம் ஒன்று வேரோடு சாய்ந்து விழுந்தது. இதனால் போக்குவரத்து பாதிக்கப்பட்டது. நெடுஞ்சாலை மற்றும் தீயணைப்பு துறையினர் விரைந்து வந்து சாலையில் விழுந்த மரத்தை வெட்டி அப்புறப்படுத்தும் பணியில் ஈடுபட்டு வருகின்றனர். கனமழை காரணமாக சேரன் நகர்-2 பகுதியில் அரசு பள்ளியின் சுற்றுச்சுவர் இடிந்து அருகில் இருந்த வீடுகளின் மேல் விழுந்துள்ளது. இதில் அதிர்ஷ்டவசமாக வீடுகளில் இருந்த பொதுமக்கள் உயிர் தப்பினர். மழைநீர் வீடுகளுக்குள் புகுந்து பொதுமக்கள் பெரும் சிரமத்தை சந்தித்து வருகின்றனர்.