கோவையில் ஒரே நாளில் மூன்று தனி சாலை விபத்துகளில் மூவர் உயிரிழப்பு

Coimbatore: கோவையில் தனித்தனியாக நடந்த மூன்று சாலை விபத்துகளில் மூதாட்டி, இளைஞர் மற்றும் முதியவர் என மூவர் உயிரிழந்துள்ளனர். கோவை உக்கடம் வின்சென்ட் ரோடு ஹவுசிங் யூனிட் பகுதியைச் சேர்ந்த சாகுல் ஹமீதின் மனைவி சம்சுநிஷா (55), சம்பவத்தன்று காலை 11.50 மணியளவில் உக்கடத்தில் இருந்து டவுன்ஹால் செல்லும் ஒப்பணக்கார வீதி, ஆர்.ஜி. வீதி சந்திப்பு அருகே உள்ள லட்சுமி நரசிம்மர் கோவில் பகுதியில் சாலையைக் கடக்க முயன்றார். அப்போது உக்கடத்தில் இருந்து வந்த டவுன் மினி பஸ் அவர் மீது மோதியது. நிலைதடுமாறி சாலையில் விழுந்த சம்சுநிஷாவின் தலை, வயிறு மற்றும் வலது காலில் பலத்த எலும்பு முறிவு மற்றும் காயங்கள் ஏற்பட்டன. ரத்த வெள்ளத்தில் மிதந்த அவரை அக்கம் பக்கத்தினர் மீட்டு ஆம்புலன்ஸ் மூலம் கோவை அரசு மருத்துவமனைக்கு அனுப்பி வைத்தனர். ஆனால் அங்கு பரிசோதித்த டாக்டர்கள், அவர் ஏற்கனவே இறந்து விட்டதாக தெரிவித்தனர். இதுகுறித்து இறந்தவரின் உறவினரான பர்சானா அளித்த புகாரின் பேரில், விபத்தை ஏற்படுத்திய வடவள்ளி கருப்பராயன் கோவில் வீதியைச் சேர்ந்த சந்தோஷ் மகன் சந்தீப் குமார் (27) என்ற டிரைவர் மீது போக்குவரத்து புலனாய்வு பிரிவு (மேற்கு) போலீசார் வழக்குப் பதிவு செய்து விசாரணை மேற்கொண்டு வருகின்றனர். இதேபோல், கோவை உடையாம்பாளையம் சிந்து நகர் அஞ்சுகம் நகர் பகுதியைச் சேர்ந்த மாடசாமியின் மகன் விஷ்ணு (21), கடந்த 6-ம் தேதி அதிகாலை 2.30 மணியளவில் தனது பைக்கில் மேட்டுப்பாளையம் சாலையில் தெற்கில் இருந்து வடக்கு நோக்கி சென்று கொண்டிருந்தார். துடியலூர் முன்பாக சென்ற போது, பைக் திடீரென கட்டுப்பாட்டை இழந்து சாலையில் சறுக்கி கீழே விழுந்தது. இதில் தூக்கி வீசப்பட்ட விஷ்ணுவின் தலையில் பலத்த காயம் ஏற்பட்டு ரத்தம் கொட்டியது. அவரை மீட்டு உடனடியாக சிகிச்சைக்காக கோவை அரசு மருத்துவமனையில் சேர்த்தனர். அங்கு தீவிர சிகிச்சை பிரிவில் இருந்த விஷ்ணுவை பரிசோதித்த டாக்டர்கள் அவர் ஏற்கனவே உயிரிழந்து விட்டதாக தெரிவித்தனர். இதுகுறித்து அவரது தம்பி சிவகுமார் அளித்த புகாரின் பேரில் மேற்கு போக்குவரத்து புலனாய்வு பிரிவு இன்ஸ்பெக்டர் விஸ்வநாதன் வழக்குப் பதிவு செய்து விசாரணை நடத்தி வருகிறார். மேலும், கோவைப்புதூர் பிரிவு அப்துல் கலாம் வீதியைச் சேர்ந்த ரத்தினசாமியின் மகன் விஜயகுமார் (45), கடந்த 4-ம் தேதி மாலை 3 மணியளவில் தனது ஸ்கூட்டரில் கோவைப்புதூரில் இருந்து சுண்டக்காமத்தூர் செல்லும் சாலையில் ஜே.ஆர். பேக்கரி அருகே சென்று கொண்டிருந்தார். அப்போது ஸ்கூட்டர் நிலைதடுமாறி சாலையில் கவிழ்ந்தது. கீழே விழுந்த விஜயகுமாரின் தலையில் பலத்த காயம் ஏற்பட்டது. உயிருக்கு ஆபத்தான நிலையில் இருந்த அவரை மீட்டு சிகிச்சைக்காக கோவை அரசு ஆஸ்பத்திரியில் சேர்த்தனர். அங்கு அவருக்கு டாக்டர்கள் தீவிர சிகிச்சை அளித்து வந்தனர். ஆனாலும் சிகிச்சை பலனளிக்காமல் விஜயகுமார் பரிதாபமாக உயிரிழந்தார். இதுகுறித்து அவரது உறவினர் ரத்தினம் அளித்த புகாரின் பேரில் போக்குவரத்து புலனாய்வு பிரிவு போலீசார் வழக்குப் பதிவு செய்து விசாரித்து வருகின்றனர்.