கோவை இரத்தினபுரியில் 1 கிலோ கஞ்சா, 148 கஞ்சா சாக்லேட்டுகளுடன் மூவர் கைது

Coimbatore: கோவை மாநகரம் இரத்தினபுரி காவல் நிலைய எல்லைக்குட்பட்ட சாஸ்திரி நகர் சுடுகாடு பகுதியில் கஞ்சா மற்றும் கஞ்சா சாக்லேட்டுகள் விற்பனை செய்த மூன்று இளைஞர்கள் காவல்துறையினரால் கைது செய்யப்பட்டனர். இவர்களிடமிருந்து 1 கிலோ கஞ்சா, 148 கஞ்சா சாக்லேட்டுகள் மற்றும் குற்ற சம்பவத்திற்கு பயன்படுத்திய இருசக்கர வாகனம் பறிமுதல் செய்யப்பட்டது. சாஸ்திரி நகர் சுடுகாடு பகுதியில் கஞ்சா மற்றும் கஞ்சா சாக்லேட்டுகள் விற்பனை செய்யப்படுவதாக 26.09.2026 அன்று காலை 10.30 மணிக்கு உதவி ஆய்வாளர் கஜேந்திரனுக்கு இரகசிய தகவல் கிடைத்தது. இத்தகவலின் பேரில், தலைமை காவலர் ஒய்.சாலமன், முதல் நிலை காவலர் எஸ்.பிரபு ஆகியோர் அடங்கிய தனிப்படை காலை 11.15 மணிக்கு சாஸ்திரி நகர் சுடுகாடு பகுதியில் வாகன தணிக்கையில் ஈடுபட்டது. அப்போது TN 99 AH 6174 என்ற சாம்பல் நிற Pleasure இருசக்கர வாகனத்தில் வந்த மூன்று இளைஞர்களை தனிப்படையினர் பிடித்து விசாரணை மேற்கொண்டனர். இவர்களிடமிருந்து 1 கிலோ கஞ்சா மற்றும் 148 கஞ்சா சாக்லேட்டுகள் மற்றும் குற்ற சம்பவத்திற்கு பயன்படுத்திய இருசக்கர வாகனம் பறிமுதல் செய்யப்பட்டது. பிடிபட்டவர்கள் அபுபக்கர் சித்திக் (25), சர்புதீன் (22), முருகன் (21) என அடையாளம் காணப்பட்டனர். விசாரணையில், அபுபக்கர் சித்திக் பெங்களூரில் IT நிறுவனத்தில் பணிபுரிந்த போது கஞ்சா பழக்கத்திற்கு அடிமையாகியது தெரியவந்தது. பின்னர் அவர் தனது உறவினரான சர்புதீன் மற்றும் நண்பர் முருகனுக்கும் கஞ்சா பழக்கத்தை பரப்பியது விசாரணையில் வெளிப்பட்டது. மூவரும் கடந்த வாரம் தமிழக - ஆந்திர எல்லையான சித்தூர் பகுதியில் பெயர் விலாசம் தெரியாத நபரிடமிருந்து கஞ்சாவை வாங்கி வந்தனர். கூலி தொழிலாளர்கள், கல்லூரி மாணவர்கள் மற்றும் வடமாநில இளைஞர்கள் அதிகம் தங்கியுள்ள சாஸ்திரி நகர் பகுதியில் இந்த கஞ்சாவை மூவரும் விற்பனை செய்து வந்தனர் என்பது விசாரணையில் தெரியவந்தது. இது தொடர்பாக இரத்தினபுரி காவல் நிலையத்தில் வழக்கு பதிவு செய்யப்பட்டு, மூவரும் கைது செய்யப்பட்டு நீதிமன்ற காவலில் அடைக்கப்பட்டனர். இவ்வழக்கின் புலன் விசாரணையை இரத்தினபுரி புலனாய்வு பிரிவு காவல் ஆய்வாளர் ஜான் கிங்ஸ்லி கிறிஸ்டோபர் மேற்கொண்டு வருகிறார்.