Coimbatore: கோவை மாவட்டத்தில் புறநகர் பகுதிகளில் பல்வேறு இடங்களில் கன மழை பெய்ததால் வெயில் தணிந்து குளிர்ச்சியான சூழல் நிலவி வருகிறது.
கோவை, நீலகிரி, திருப்பூர் உள்ளிட்ட மாவட்டங்களில் இன்று கன மழை பெய்யக்கூடும் என்று சென்னை வானிலை ஆய்வு மையம் முன்னதாக தெரிவித்திருந்தது.
அதன்படி கோவை மாவட்டத்தில் காலை முதல் வெயில் அதிகரித்து காணப்பட்ட நிலையில் மாலை நேரத்தில் பல்வேறு இடங்களில் பரவலாக மழை பெய்தது. குறிப்பாக புறநகர் பகுதிகளான துடியலூர், பெரியநாயக்கன்பாளையம், நரசிம்மநாயக்கன்பாளையம், கவுண்டம்பாளையம், ஜி என் மில்ஸ் உள்ளிட்ட பகுதிகளில் சுமார் 1 மணி நேரம் கன மழை பெய்தது.
இதனால் வாகன ஓட்டிகள் பலரும் ரெயின் கோட் அணிந்த வண்ணம் பயணம் மேற்கொண்டனர். சாலைகளில் நடந்து செல்வோர் குடைகளை பிடித்த வண்ணம் நடந்து சென்றனர். கனமழை காரணமாக வெயில் தணிந்து குளிர்ச்சியான சூழல் நிலவியது.
