கோவை மாவட்ட அணைகளின் நீர்மட்ட விவரம்

Coimbatore: கோவை மாவட்டத்தில் உள்ள முக்கிய நீர்த்தேக்கங்களான ஆழியாறு, பரம்பிக்குளம் மற்றும் சோலையாறு அணைகளின் நீர்மட்ட நிலவரம் குறித்து நீர்வளத்துறை அதிகாரிகள் விவரங்களை வெளியிட்டுள்ளனர். ஜூலை 30ஆம் தேதி நிலவரப்படி, மூன்று அணைகளிலும் வெவ்வேறு அளவிலான நீர்மட்ட மாற்றங்கள் பதிவாகியுள்ளன.

ஆனைமலையை அடுத்த ஆழியாறு அணை 120 அடி முழு கொள்ளளவு கொண்டதாகும். தற்போது அணையின் நீர்மட்டம் 54.7 அடியாக உள்ளது. அணைக்கு வினாடிக்கு 195 கன அடி நீர்வரத்து பதிவாகி வருகிறது. அதே நேரத்தில், அணையில் இருந்து 250 கன அடி நீர் வெளியேற்றப்பட்டு வருகிறது. மழைப்பொழிவு குறைந்ததால் அணைக்கு நீர்வரத்து தொடர்ந்து குறைந்து வரும் நிலை காணப்படுகிறது என்று நீர்வளத்துறை அதிகாரிகள் தெரிவித்தனர்.


பொள்ளாச்சி அருகே அமைந்துள்ள பரம்பிக்குளம் அணையின் மொத்த கொள்ளளவு 72 அடியாகும். இந்த அணையின் தற்போதைய நீர்மட்டம் 25.36 அடியை எட்டியுள்ளது. அணைக்கு வினாடிக்கு 937 கன அடி என்ற அளவில் அதிகமான நீர்வரத்து பதிவாகி வருகிறது. அணையில் இருந்து 40 கன அடி நீர் வெளியேற்றப்படுகிறது. தென்மேற்கு பருவமழை காரணமாக பரம்பிக்குளம் அணையின் நீர்மட்டம் தொடர்ந்து உயர்ந்து வரும் நிலை காணப்படுகிறது. இதனால் பகுதி விவசாயிகள் பெரும் மகிழ்ச்சி அடைந்துள்ளனர்.


வால்பாறை அருகே அமைந்துள்ள சோலையாறு அணையின் முழு கொள்ளளவு 160 அடியாகும். தற்போது அணையின் நீர்மட்டம் 59.22 அடியை எட்டியுள்ளது என நீர்வளத்துறை அதிகாரிகள் தெரிவித்தனர். சோலையாறு அணைக்கு வினாடிக்கு 942 கன அடி என்ற கணக்கில் நீர்வரத்து பதிவாகி வருகிறது. அணையில் இருந்து 514 கன அடி நீர் வெளியேற்றப்படுகிறது. தென்மேற்கு பருவமழையின் தொடர் தாக்கத்தால் சோலையாறு அணையின் நீர்மட்டமும் தொடர்ந்து உயர்ந்து வரும் சாதகமான நிலை உள்ளது.


கோவை மாவட்டத்தில் பருவமழை காரணமாக பெரும்பாலான அணைகளின் நீர்மட்டம் உயர்ந்து வரும் நிலையில், விவசாயிகள் மற்றும் குடிநீர் பயன்பாட்டிற்கான நீர்வளம் போதுமான அளவில் கிடைக்கும் என எதிர்பார்க்கப்படுகிறது. நீர்வளத்துறை அதிகாரிகள் தொடர்ந்து அணைகளின் நீர்மட்டத்தை கண்காணித்து வருகின்றனர்.