கோவை வி.வி.எம் ஹோம் நகர்புற ஆரம்ப சுகாதார நிலையத்தில் மார்பகப்புற்றுநோய் விழிப்புணர்வு அதிர்ஷ்ட பெட்டி திறப்பு

Coimbatore: கோவை மாநகராட்சிக்கு உட்பட்ட வி.வி.எம் ஹோம் நகர்ப்புற ஆரம்ப சுகாதார நிலையத்தில் மார்பகப்புற்றுநோய் விழிப்புணர்வு அதிர்ஷ்ட பெட்டி அமைக்கப்பட்டு, மாநகராட்சி ஆணையாளர் கட்டா ரவி தேஜா அதனை அக்டோபர் 23, 2026 அன்று திறந்து வைத்தார். அவர் முதல் நபராக மார்பகப்புற்றுநோய் விழிப்புணர்வு அதிர்ஷ்ட கூப்பனை பூர்த்தி செய்து அதிர்ஷ்ட பெட்டிக்குள் செலுத்தினார்.

உலகளவில் ஒவ்வொரு ஆண்டும் அக்டோபர் மாதம் மார்பகப்புற்றுநோய் விழிப்புணர்வு மாதமாக கடைபிடிக்கப்படுகிறது. இந்நிகழ்வாண்டிற்கான கருப்பொருள் "ஒவ்வொரு கதையும் தனித்துவமானது ஒவ்வொரு பயணமும் முக்கியமானது" என்பதாகும். ஆரம்பநிலையிலேயே கண்டறிந்து ஆரோக்கியமான வாழ்வை மேம்படுத்த 18 வயதிற்கு மேற்பட்ட மகளிர் அனைவரும் கட்டயமாக அருகிலுள்ள நகர்ப்புற அரசு ஆரம்ப சுகாதார நிலையங்களில் மேற்கொள்ளப்படும் மார்பகப்புற்றுநோய் பரிசோதனை மேற்கொள்ள வேண்டும்.

மார்பகத்தில் புதிதாகக் கட்டி அல்லது தடிப்பு தோன்றுதல், மார்பகத்தின் அளவு அல்லது வடிவத்தில் மாற்றம் ஏற்படுதல், தோலில் பள்ளம் விழுதல், முலைக்காம்பு உள்ளிழுத்தல், முலைக்காம்பிலிருந்து இரத்தம் கலந்த திரவம் வெளியேறுதல், அக்குள் பகுதியில் கட்டி அல்லது வீக்கம் ஏற்படுதல் மற்றும் மரபணு சார்ந்த அபாயம் போன்றவை கவனிக்க வேண்டிய அறிகுறிகளாகும்.

மேலும், மார்பகப் புற்றுநோய் ஆரம்ப நிலையில் வலி இல்லாமலும் இருக்கலாம். மார்பகத்தில் ஏற்படும் அனைத்து கட்டிகளும் புற்றுநோய் அல்ல என்றாலும், புதிய மாற்றங்கள் தென்பட்டால் தாமதிக்காமல் மார்பகப்புற்றுநோயை உறுதிபடுத்தும் பரிசோதனைகளான திசு பரிசோதனை மற்றும் மேமோகிராம் பரிசோதனைகளை அரசு மருத்துவ நிலையங்களை அணுகி மருத்துவர்களின் ஆலோசனையின்படி, மும்முனை சிகிச்சைகளான அறுவை சிகிச்சை, கீமோதெரபி மற்றும் கதிரியக்க சிகிச்சை போன்ற உயர்தர சிகிச்சைகளை பெறுவதன் மூலம் நலமுடன் வாழமுடியும்.

எனவே, ஆரம்பகாலக் கண்டறிதலே உயிர்காக்கும் தடுப்பு நடவடிக்கைகள், உரிய பரிசோதனைகள் மற்றும் நவீன சிகிச்சைகள் குறித்து மகளிர் அறிந்துகொள்வது அவசியம் என்பதை மையமாக கொண்டு வைசியாள் வீதி வி.வி.எம் ஹோம் நகர்ப்புற ஆரம்ப சுகாதார நிலையத்தில் இந்த மார்பகப்புற்றுநோய் விழிப்புணர்வு அதிர்ஷ்ட பெட்டி பிங்க் நிறத்தில் வடிவமைக்கப்பட்டு அதன் நான்கு பக்கத்திலும் மார்பகப்புற்றுநோய் குறித்த விழிப்புணர்வு வாசகங்கள் காட்சிப்படுத்தப்பட்டுள்ளது.

இந்த பெட்டியானது வரும் அக்டோபர் மாதம் 30 தேதி வரை பொதுமக்கள் அதிர்ஷ்ட கூப்பனை செலுத்துவதற்காக வைக்கப்பட்டிருக்கும். மூன்று கேள்விகள் அடங்கிய அதிர்ஷ்ட கூப்பன்களை கட்டணமில்லாமல் பெற்று பெயர், செல்போன் எண்களை நிரப்பி காலை 10 மணி முதல் மாலை 4 மணி வரை செலுத்தலாம். இம்மாத இறுதியில் அதிர்ஷ்ட பெட்டி திறக்கப்பட்டு குலுக்கள் முறையில் தேர்ந்தெடுக்கப்படும் 5 அதிர்ஷ்டசாலிகளுக்கு பட்டுப்புடவைகள் பரிசாக வழங்கப்படும் என மாநகராட்சி ஆணையாளர் தெரிவித்துள்ளார்.