இங்கிலாந்தின் சண்டர்லேண்ட் பல்கலைக்கழகத்துடன் ஸ்ரீ ராமகிருஷ்ணா கல்வி நிறுவனங்கள் ஒப்பந்தம்

Coimbatore: கோவையில் உள்ள எஸ்.என்.ஆர். சன்ஸ் அறக்கட்டளையின் கீழ் செயல்பட்டு வரும் ஸ்ரீ ராமகிருஷ்ணா கல்வி நிறுவனங்கள், இங்கிலாந்தில் உள்ள சண்டர்லேண்ட் பல்கலைக்கழகத்துடன் புரிந்துணர்வு ஒப்பந்தத்தில் (MoU) கையெழுத்திட்டுள்ளன. கல்விசார் ஒத்துழைப்பு, கூட்டு ஆராய்ச்சி மற்றும் மாணவர்கள், பேராசிரியர்கள் பரிமாற்றத் திட்டங்களை மேம்படுத்தும் நோக்கில் இந்த ஒப்பந்தம் மேற்கொள்ளப்பட்டுள்ளது.

இந்தப் புரிந்துணர்வு ஒப்பந்தம் சண்டர்லேண்ட் பல்கலைக்கழகத்தின் சிட்டி வளாகத்தில் கையெழுத்தானது. ஸ்ரீ ராமகிருஷ்ணா கல்வி நிறுவனங்களின் சார்பில் எஸ்.என்.ஆர். சன்ஸ் அறக்கட்டளையின் நிர்வாக அறங்காவலர் டாக்டர் சுந்தர் ராமகிருஷ்ணன் தலைமையிலான குழுவினர் பங்கேற்றனர். அவருடன் ஸ்ரீ ராமகிருஷ்ணா பொறியியல் கல்லூரியின் முதல்வர் டாக்டர் ஏ. சௌந்தரராஜன் மற்றும் ஸ்ரீ ராமகிருஷ்ணா மகளிர் கலை மற்றும் அறிவியல் கல்லூரியின் முதல்வர் டாக்டர் கே. சித்ரா ஆகியோர் கலந்து கொண்டனர்.

இந்த ஒப்பந்த நிகழ்வை சண்டர்லேண்ட் பல்கலைக்கழகத்தின் சர்வதேச அலுவலகம் ஏற்பாடு செய்திருந்தது. நிகழ்வில் சர்வதேச அலுவலக இயக்குநர் இயான் மூடி, துணை இயக்குநர் லொரெய்ன் ராபர்ட்சன், சர்வதேச மேம்பாட்டுத் துறைத் தலைவர் ஜேமி சிம்ப்சன் மற்றும் சர்வதேச பிராந்தியக் குழுத் தலைவர் டாம் அட்கின்சன் ஆகியோர் பங்கேற்றனர்.

ஒப்பந்தம் கையெழுத்தானதைத் தொடர்ந்து, ஸ்ரீ ராமகிருஷ்ணா கல்வி நிறுவனங்களின் பிரதிநிதிகள் சண்டர்லேண்ட் பல்கலைக்கழகத்தின் சிட்டி வளாகத்தையும் சுகாதார அறிவியல் துறையின் கட்டமைப்பு வசதிகளையும் பார்வையிட்டனர். மேலும் சுகாதார அறிவியல் மற்றும் நல்வாழ்வுத் துறையைச் சேர்ந்த பேராசிரியர்கள் ஜேன் ஆம்ஸ்ட்ராங் மற்றும் ஏட்ரியன் மூர் ஆகியோரைச் சந்தித்து, சுகாதாரம் மற்றும் அது சார்ந்த அறிவியல் துறைகளில் கூட்டு ஆராய்ச்சிகளை மேற்கொள்வது குறித்து கலந்துரையாடினர்.

அதனைத் தொடர்ந்து, அன்றைய பிற்பகலில் பல்கலைக்கழகத்தின் செயின்ட் பீட்டர்ஸ் வளாகத்திற்கு பிரதிநிதிகள் சென்றனர். அங்கு வணிகம் மற்றும் தொழில்நுட்பப் புலத்தின் ஆராய்ச்சித் தலைவர் பேராசிரியர் நாட்ஜா டாமிஜ் அவர்களைச் சந்தித்து, வணிகம் கணினி அறிவியல் மற்றும் பொறியியல் துறைகளில் கூட்டு ஆராய்ச்சி மேற்கொள்வதற்கான வாய்ப்புகள் குறித்து விரிவாக ஆலோசனை நடத்தினர்.

இறுதியாக, வணிகவியல், பொறியியல், படைப்புக் கலைகள் ஊடகம் மற்றும் கணினி அறிவியல் உள்ளிட்ட பல்வேறு கல்வித் திட்டங்கள் செயல்பட்டு வரும் செயின்ட் பீட்டர்ஸ் வளாகத்தைப் பிரதிநிதிகள் பார்வையிட்டதுடன், அவர்களது பல்கலைக்கழகப் பயணம் நிறைவடைந்தது.